Inicio >
Historias > Ballade [de conclusion]
Ballade [de conclusion]
Por: François Villon
Icy se clost le testament
Et finist du povre Villon
Venez a son enterrement,
Quand vous orez le carrillon,
Vestuz rouge come vermeillon,
Car en amours mourut martir;
Ce jura il sur son coullon,
Quant de ce monde voult partir.
Et je croy bien que pas n'en ment;
Car chassié fut comme ung soullon,
De ses amours haineusement,
Tant que, d'icy a Roussillon
Brosses n'y a ne brossillon
Qui n'eust, ce dit il sans mentir,
Ung lambeau de son cotillon,
Quant de ce monde voult partir.
Il est ainsi et tellement:
Quant mourut n'avoit qu'un haillon;
Qui plus, en mourant, mallement
L'espoignoit d'Amour l'esguillon;
Plus agu que le ranguillon
D'ung baudrier lui faisoit sentir
- C'est de quoy nous esmerveillon -,
Quant de ce monde voult partir.
Prince gent comme esmerillon,
Saichiez qu'il fist au departir:
Ung traict but de vin morillon,
Quant de ce monde voult partir.
2005-02-25 01:00 | 0 Comentarios
Referencias (TrackBacks)
URL de trackback de esta historia http://gargantua1.blogalia.com//trackbacks/27191
Comentarios
portada | subir